Ayera, diabierna, di 9 di Februari, a tuma luga e tradicional Kiwanis Masquerade Party, den su di 21 edicion, cu porcierto tin cu bisa, tabata un exito rotundo. Por a nota claramente cu carnaval ta den sanger di nos hendenan, mirando e creatividad cu nan a sa di desplega durante e magno evento aki.
E fiesta aki, cu contribucion di Aruba Bank, ta pa Kiwanis recauda fondo pa yuda esnan cu tin mas mester den nos comunidad. E fiesta aki sin duda ta wordo cataloga tur aña como e fiesta di aña y e hottest party in town. Manera custumber, e fiesta tabata yena cu sorpresa y ambiente y a dura pasa di 2’or y mey di marduga.
Tsunami, ‘N Fuzion y Robert y su Solo Banda Show a percura pa e tremendo ambiente reina den Renaissance Convention Center, sin laga afo e popular Hora Loca pa cual e fiesta ta bon conoci tambe.
Pa loke ta e decoracion, esaki sigur a transforma e Convention Center den un luga unico pa celebra final di e temporada di Carnaval. Sin lubida e Open Premium Bar y Snacks. Esaki tabata un fiesta cu no mester a bin cu cartera. Djis percura pa tin e ticket y tur cos ta bin dimes.
Esaki sigur por wordo cataloga como E fiesta, pa cuminsa cu e ultimo fin di siman di Carnaval a lo grande. Pabien na miembronan di Kiwanis cu un tremendo fiesta.
