Gina Maduro, presidente di ABV, a splica cu nan a cuminsa cu negociacion di CAO cu hospital den luna di Maart. Y ainda tur cos ta curu, den e sentido cu apenas a manda nan puntonan, calculacionnan ta wordo haci y awe a sinta prome biaha hunto cu mediador di gobierno, kende ta envolvi den e negociacionnan.
Apenas nan ta den principio. Esaki ta e comienso. Un cos si Maduro a menciona cu ABV no tin solamente e CAO di hospital, pero tambe e tin di FSMLA, trahadonan di labortorio, e respaldo cu ta un fundacionnan nobo, trahadonan di PAAZ, cual ta Respaldo. Tambe nan tin negociacion di SABA, cu a cuminsa tambe. A sinta prome biaha y tin cu continua cun’e. Negociacion di CAO di SABA y Imsan, cu desde aña pasa a cuminsa y cu no a caba tampoco. Ta bezig cu cinco CAO en principio. Casi tur e CAOnan den cuido, unda cu ABV tin su miembronan, a caduca.
Prioridad
Awor aki prioridadnan den tur e CAOnan, primordial den cerca tur trahado, ta aumento di salario. Mirando e ultimo indexering cu a tuma luga dia 1 di Januari 2013, ya ta cinco aña despues y mirando e desaroyo den ultimo temponan y costo di bida a subi, trahadonan kier mira un aumento den salario directo.
Ta depende di entrada di gobierno
Gina Maduro a splica cu tur entrada tin di haber cu gobierno, directo of indirectamente. ABV sa di e situacion di pais Aruba, pero di un otro banda nan ta traha pa un fundacion y e fundacion mester percura pa su trahadonan. Imsan mester percura pa su trahadonan, SABA mester percura pa su trahadonan. E dunadonan di trabao tambe mester percura pa por tin un presupuesto pa por negosha un CAO.
Envolvimento di mediador
Riba esaki Maduro a splica, cu den historia, si tin cu compara cu tur e negociacionnan di CAO den institucionnan di mediador, ta purba bo so, pero na final mester pidi pa envolvimento di mediador di gobierno. Mediador di gobierno semper ta na mesa cerca tur institucionnan di cuido.
Di dos prioridad
Salubridad tin diferente CAO. Si tin cu papia di hospital, e aumento di salario ta conta pa tur institucion. Pa hospital ta e pensioen cu tin cu keda cla. Te awor aki e ta riba 11.5, pero ainda e ta bao di e norma, compara cu Imsan y SABA. E pensioen y algun beneficio secundario cu tin cu wordo mehora.
ABV ta enfocando riba un suma igual. Si mira hospital, tin hopi dokter y specialista cu salarionan hopi mas halto den loondienst di hospital, sin conta e IO’ernan. Si bay bringa pa un porcentahe halto, e grandinan ta haya mas y e chikitonan ta haya menos. Pesey a bay pa un suma fiho.
Un suma pasabel
Tin un suma, cual Maduro no a menciona. Na hospital tin 1075 empleado, di cual tin cu wak cua ta specialista den loondienst, cuanto ta IAOer y cuanto ta CAOer. Na final ta ABV ta bringa pa CAO y ta hospital ta pone tur hende hunto den pot, pero e sindicato ta bay pa e CAOernan.
Negociacion
A cuminsa negosha prome e CAO, pero door cu mester a warda riba begrotting, etc., door di esey a bin tardamento. For di Maart nan ta na mesa y e CAO a caduca entrante 1 di Juni.
