Presidente di Parlamento, mr. Ady Thijsen a dicidi recientemente cu e ta apela e sentencia di Corte den Prome Instancia cu nos colega Nelson Andrade a entama contra dje. Locual si el a haci ta di cambia di abogado y a pone su confiansa den e bufete James Martin & Associates. E actual Presidente di Staten semper tabata masha cerca di e bufete ey, cu casi e por duna di pensa cu e lo por tabata hasta traha cu nan.
Manera ta conoci, dia 1 di december 2017, a base di informacion suministra dor di e propio Rocco Tjon di MEP, a traha un raportahe sinta riba e stoel di Presidente di Parlamento, relaciona cu e discusion riba escudo di Aruba of e shoco den sala di reunion di Parlamento. E sala tabata bashi y no tabatin ningun reunion andando. A base di e raportahe, Thijsen a opta pa manda un carta pa Andrade y despues cu e ultimo aki a critica e carta den su noticiero na radio, a dicidi di mande un prohibicion pa drenta edificio di Parlamento.
Hues mr. Sap a mira e asunto diferente y a duna Nelson Andrade rason pa busca su derecho y asina a elimina e decision di e Parlamentario. Es mas, Hues a bisa Ady Thijsen cu e NO tin ningun poder pa sanciona of duna castigo pa locual un hende haci of bisa pafor di sala di Parlamento. El a corde cu su “autoridad” ta cuminsa y caba den e edificio di Parlamento.
Obviamente e Parlamentario, cu de facto tambe ta abogado, no a keda contento ni cu e decision di e Magistrado y ni cu e forma con abogado mr. Nany Gravenstijn a bringa su caso pe. Den Corte na dado momento e mes a tuma palabra te cu un rato Hues a corde cu ta den Parlamento e ta manda, pero cu den Corte ta Hues tin e poder maximo. Awor el a acerca abogado mr. Gabri de Hoogd pa bringa e caso pe den apelacion.
Gabri de Hoogd ta un abogado Hulandes cu na Aruba a bira “popular” ora a nenge di bira Decano di Orden di Abogadonan. Es mas, a evalua pa kite como abogado, debi na un problema serio cu el a haya su mes aden na Hulanda. Despues el a haye den problema na Aruba den un caso di Aruba Airlines, cu tambe a percura pa dune un mal nomber. Y comosifuera poco na aña 2016 Polis a gare burachi tras di stuur despues cu el a dal un auto y core bay.
Un fecha pa e caso den Hoger Beroep no tin ainda. Nelson Andrade si ta sigui cu confiansa den abogado mr. David Kock cu a gana Gravenstijn den e caso sumario y ta cla awor pa enfrenta De Hoogd den apelacion tambe. E hecho cu Presidente di Parlamento a scoge un bufete asina cerca di dje ya a lanta masha interogatorio. Ta conoci cu prome cu e caso sumario Thijsen a acerca otro bufetenan caba pa bringa e caso pe, pero nan a nenga.
