Adicto ambulante a resisti pisa ora cu polis a hay’e cu tas cu pata pata di dollar

Central a manda patruya patras di La Moderna pa un robo of ladronicia.

Eynan e homber Venezolano CC a acerca polis y a declara cu e mainta ey, el a haci denuncia di ladronicia. Tambe el a declara cu e tabata tin mas di 5000 dollar den un tas preto cu e tabata tin su auto staciona den Avenida Alo Tromp, na altura di Kini Kini Building, y cu esaki a wordo horta pa desconocidonan. Alabes el a declara cu durante cu e tabata buscando e tas, el a topa cu e conocido adicto ambulante y recidivista GH, y na momento cu el a puntr’e si el a mira un tas preto, esaki a duna di conoce cu su placa ta den e edificio di ex Gym Centrum, situa den Elleboogstraat. Hunto cu e conocido adicto ambulante Chico Gang, polis a drenta hunto cu CC en busca di su tas. Den e edificio di ex Downtown Gym, no tabata tin coriente. Durante e buskeda, polis a bin topa cu e conocido adicto ambulente EK, kende tabata tin un tas color scur den su poder. Na momento cu a puntr’e si e tas ta di dje, el a indica cu ta asina. Ora cu a pidi’e pa wak kico tin den e tas, a constata cu den dicho tas tabata tin un gran cantidad di dollar den varios biyete. Na momento cu el a sali p’afo di e luga, polis a ripara cu e tas cu EK tabata tin den su poder tabata color berde. Mirando cu no tabata tin coriente, tabata dificil pa tin un bon bista riba e tas. A base di esaki, a bay pa detene EK di biaha. Durante su detencion EK a resisti door di a trek su mannan den otro direccion, pero toch polis a logra pone boei na nan. Mirando e severidad di su resistencia, mester a propina EK cu un kinsena na su pia parti ariba pa asina por kibra e resistencia. El a wordo hiba warda, unda cu el a keda presenta dilanti di fiscal auxiliar y encarcela pa mas investigacion.