E gobierno nobo pa proximo temporada ta cla. Despues cu e formador mes a anuncia esaki, a busca algun informacion di e carteranan y esaki ta conoci. MEP lo haya cinco minister, POR lo haya dos minister y RED lo haya un minister. Total un gobierno di 8 minister. E ultimo gobernacion tabata di 9 minister. Awor mester warda 7 parlamentario entrega nan asiento pa asina huramenta como minister. Den e proceso pa evita loke a pasa na Corsow, tur cos ta mustra cu lo purba retira un pa un di parlamento y laga e parlamentarionan huramenta prome cu e ministernan. Lo no retira den bloke for di parlamento pa evita loke cu a pasa na Corsow caminda opocision a keda cu mayoria y keda sin aproba e geloofsbrieven. Pa awor aki Evelyn Croes dimes lo ta Prome Minister y Minister di Asuntonan General. E lo tin mas cartera cu lo resorta bou di su persona. Xiomara Ruiz Maduro lo haya e cartera di Finanzas y Economia. Chris Romero lo bira minister di Transporte cu Telecomunicacion y Sector Primario. Glenbert Croes lo bira minister di Energia, Labor y asuntonan Social. Dangui Oduber lo bira mnister di Turismo, Deporte. Dangui lo haya APA y AAA tambe. Ta wordo menciona hasta cu Dangui lo haya cartera di Salubirdad Publico pero esaki nos fuente no por a confirma 100%. Mientrastanto e otro partidonan tambe a haya nan cartera y ministernan cu lo carga e carteranan. Otmar Oduber di POR lo haya Infrastructura y Medio Ambiente mientras cu Andin Bikker lo haya Husticia y DIMAS. DIMAS ta opdracht di Gobernador pa nan dos bay hunto. E tabata asina caba durante gobernacion di MEP den pasado. Tabata cay Husticia y Estranheria bou di Rudy Croes pero despues Hulanda mes a kita estranheria for di Rudy Croes duna Booshi Wever. Finalmente RED tambe lo ta parti di gobierno nobo y aki Rudy Lampe lo bira e minister di Enseñanza. Ady Thijsen lo bira Minister Plenipotenciario na Hulanda. E mester ta un persona di confianza di partido cu ta resorta mesora bou di prome minister di Aruba. Kizas ainda por dura pa e ministernan huramenta. Mester tuma lugar reunionnan den parlamento pa retiro di e 7 Parlamentarionan cu lo bira minister y djey lo warda e parlamento nobo drenta pa e 8 ministernan Huramenta. E 7 parlamentarionan cu mester tuma retiro ta Evelyn Croes, Xiomara Maduro, Chris Romero, Glenbert Croes, Dangui Oduber, Otrmar Oduber y Andin Bikker. Rudy Lampe no ta den parlamento pero a retira di RED pa asina por a bira e vak minister pa RED. Lo keda pendiente pasobra awor formador lo informa gobernador pa djey wak si tur screening ta cla tambe pa despues huramenta. Esaki ta e formacion si tur screening pasa sin problema. Si cualkier un di nan no logra screening, nifica cu mester tin otro persona cla pa drenta y join e gabinete lidera pa Evelyn Croes.
