Diasabra merdia un team grandi di Polis a drenta un cas na Casibari. Un grupo di Polis, incluyendo Team di Aresto y recherchenan di e departamento di droga a drenta e cas Casibari # 20 pa mas o menos 12:45pm pa un investigacion grandi andando.
E cas ta pertenece na un ex Polis, cu awendia ta cu pensioen. Ta sospecha cu su mesun yiu ta den baho mundo di droga. Polis a detene dos sospechoso den e cas, a coy un auto den beslag, dos speedboat luhoso, jerrycan pa warda gasolin, jug cu droga aden y varios artefacto mas conoci pa uza den baho mundo.
Polisnan a dura casi tres ora den e investigacion. A listra den e cas, den e autonan paden y pafo di cura di cas. Tambe den apartamentonan patras di cas autoridad a listra. A papia cu autoridad cu a confirma cu tabata tin droga den e cas. A mira con Polisnan tabata confisca varios jerrycan di gasoline cu tabata den e cura di cas.
Hasta tanki di gasoline cu ta pega directo riba e motor a wordo haya yen di gasolin. Jugnan di Ijs tambe tabata den e apartamento y hunto cu e cabuyanan a bay cu tur cos warda. Dos takelwagen fuerte mester a wordo busca pa asina lastra e botonan. E ex Polis mes tabata na cas y tabata copera totalmente cu su ex coleganan cu a drenta su cas.
E mes no ta envolvi. E sospechoso principal no tabata na cas ora Polis a drenta. Despues el a presenta na e cas y eynan autoridad a pone man riba dje na entrada di e garage. Na prome instante nan no a reconoce pero despues si a yame y ora el a bolbe a detene.
Na pia el a yega na e cas. Awor e mester duna cuenta na autoridad. Parce cu regularmente e tambe sa Sali cu boto bay pazuid bin bek. Ta wordo papia cu e lo a trece un cargamento di droga. A base di esey mes nan a drenta e cas y confisca evidencianan cu por ta cuadra cu loke nan ta buscando.
