Accidente fatal: Di tres victima ta stabiel na Hospital

E hoben Marcel Tromp, naci na Aruba dia 2 di maart 1997 ta recuperando di su heridanan sufri den e desgracia serio cu a tuma luga diahuebs marduga na Shaba. Ey un motorcycle biniendo cu velocidad halto a topa cu un auto marca Nissan modelo Sentra cu dos persona aden, cu a lora su dilanti pa bay truck di pan.

Dor di e impacto e chauffeur di e motorcycle modelo Hayabusa y ocupante di e auto a fayece na e sitio. E chauffeur di e auto, Marcel Tromp a bay Hospital den situacion critico. El a yega cu sangramento serio den cabes pero toch cu poco pulso. Dokternan a haci tur lo posibel pa scapa su bida. Despues di algun ora den sala di operacion e la keda transporta pa ICU. Diahuebs atardi laat informe a drenta cu su situacion a mehora y awor ta bou observacion.

Dos hoben a perde nan bida, un a keda gravemente herida

E dos otro victimanan no a core mesun suerte, ambos a perde nan bida. Ta trata di Dyllon Lourens, naci dia 1 di october 1995, kende ta biba na Hulanda y ta cu vakantie na Aruba. E otro victima cu tabata pasahero den auto ta Wendel A. “Djaca Muis” de Leeuw naci dia 25 di December 1995. Polis a haya e melding pa 3:23am cu tin un accidente serio na Shaba entre un auto marca Nissan modelo Sentra color blauw cu number A-43141 y un motorcycle marca Suzuki modelo Hayabusa color blanco na altura di e compleho di tiendanan situa na Shaba, na Noord. E auto a lora dilanti e motorcycle cu consecuencia cu a dal den otro.

E impacto tabata asina fuerte cu e auto a saca tanto e chauffeur como e pasahero afo. Bomberonan a core yega na e sitio hunto cu Polis y Ambulance pa brinda asistencia. A topa un situacion sumamente grave! Bomberonan a yega mesora pasobra e auto a keda riba un di e victimanan.

Ambulance a transporta 1 di e 3 victimanan for di e sitio. Paramediconan a menciona cu su situacion ta critico. Cu urgencia a sali pa Hospital, unda Dokternan na Spoed Eisende Hulp tabata wardando riba dje.

Testigonan na e sitio tabata cu awa na wowo indicando cu e motociclista a caba di sali di Hot Shotz y tabata rumbo pa Lekker Bar. Su amigonan tabata biniendo su tras y diripiente a topa e accidente grave aki.

Hopi forsa na famianan den e momento dificil aki. Dos famia awe ta lanta den luto y den hopi tristesa.