Accidente cu varios auto envolvi en Rooi Frances

Diaranson atardi den careda di 4or y 15 a pasa un accidente den e famoso lorada di Franse Pas. Awa a yobe un poco y esaki tabata suficiente pa vehiculonan slip riba careteranan di Aruba si no core cu cautela.

 

Un Kia Rio bayendo den direccion di Sabana Basora a slip den e lorada y dal den banda di un otro Kia modelo Carens. Na mes momento di e prome impacto tabata tin un Chevrolet Spark patras di e Kia Rio, e chauffeur a primi brake despues di a wak e dalmento su dilanti, na su turno un pickup Toyota Hilux a bin dal tras di e Spark.

 

Un inspector di polis cu tabata pasando eybanda pa casualidad a baha atende cu e situacion di trafico. Ambulance a bin na e sitio pa check un dama pasahero di poco edad den e Kia Carens. E demas chauffeurnan y ocupantenan no tabata herido y e  daño a keda na un minimo pero na un vehiculo mas cu e otro.