Partidonan, tanto ABV como Hospital nan a start cu negociacionnan di contracto colectivo. Nan a firma un contracto colectivo na 2015. Esaki a vence.
Y awor aki e partidonan ta na mesa for di April. Nan mes a haya cu ta importante pa tin un partido cu por ta yuda den e proceso y nan a propone na mediador di gobierno pa tey un biaha mas, segun Anselmo Pontilius.
Un contracto colectivo pa Hospital, ta papiando di mas di 900 trahado den servicio di e hospital y ta puntonan hopi serio ta wordo trata, manera tur CAO. Sigur serio den e sentido cu Hospital ta depende di su presupuesto, na momento cu AZV pone e sumanan disponibel anualmente pa e presupuesto di hospital. Eynan tin varios aspecto cu ta hunga un rol y logico e sindicato tin un cantidad di demanda cu nan a pone riba mesa. Proposicionnan concreto y ta papiando di un contracto colectivo pa por lo menos 3 aña unda cu tin varios pregunta y situacion cu no ta cla riba mesa.
Eyden lo purba pa trece tambe proposicionnan cu por ta alternativanan cu e partidonan no ta tene cuenta awor aki cun’e, pero cu lo por yuda pa yega na un contracto colectivo pa e proximo luna, segun Pontilius.
Mediador presente
Den e caso di hospital, nan a propone pa mediador yuda mas tempran, hustamente pa trata di preveni un confrontacion. Pa purba cu si tin un otro partido cu por yuda pensa, con por haya alternativanan den e negociacion aki y no keda pega specificamente riba puntonan cu ta riba mesa awor aki.
Ken a pidi
Tanto gerencia di hospital, como di parti di sindicto ABV a pidi pa mediador tey presente.
Kico ABV ta buscando
Sindicato tin su puntonan concreto, tin prioridadnan y den nan prioridad nan a señala aumento di salario, considerando cu nan a mira caba cu costo di bida lo bay afecta entrada di e trahadonan. Apart di esey, tin algun punto secundario, manera pensioen y otronan, cu ta puntonan importante y teniendo cuenta tambe cu bo tin trahadornan, mescos cu na Hospital, un cantidad di otro empresa ta enfrenta trahadonan di 60 aña bay pariba. Con ta atende cu e situacion aki y toch manteniendonan den forsa laboral.
Negociacion
E partidonan lo desea di keda cla mas lihe posibel, pero ta papiando di un realidad serio, den cual hospital ta depende tambe di loke ta haya aprobacion for di AZV. Gasto di personal ta un gasto grandi den cualkier empresa y esaki no ta un excepcion. Y tin cu tene cuenta cu loke bo mara bo mes na dje den e proximo 3 añanan, si berdaramente por cumpli cu nan. No solamente cu gastonan directo, pero tambe indirecto. A start na April, nos ta na Juli, tin vakantie, pero e partidonan mes mester por mira si por convence otro pa sali den e proximo lunanan aki, pa mas tarda September of prome, na un acuerdo.
AZV
Den e caso aki, AZV automaticamente anualmente ta hay’e cu e ta atende cu e proposicionnan presupuestonan di diferente institutonan, manera hospital, Centro Medico San Nicolas y otronan, pa den cual ta via AZV e placanan di belasting, primanan cu ta wordo paga, AZV ta hay’e cu e responsabilidad aki y na su turno e ta hay’e ta discuti cu e dunadornan di trabao, pa motibo cu cada biaha semper e parti aki ta bin di economisa mas tanto posibel, mientras cu tin e trahadornan cu ta propone y exigi y demanda cambionan den nan condicionnan di trabao.
Si e partidonan ta desea pa mediador tey presente, y esey te awor aki ta e caso, lo continua cada dos siman. Tin tarea pa cada partido haci, internamente haci calculacion di kico ta e costonan pa loke ta diferente beneficionan. Ya a palabra dia 24 di Juli, pa sigui riba puntonan specifico cu ta riba mesa, segun mediador di gobierno Anselmo Pontilius.
