Dialuna anochi habitantenan di Tanki Flip a bati alarma pa gritamento den bario, comosifuera dos hende tabata maltratando otro. Polis a yega mesora na e sitio y a topa cu un hende muhe agresivo cu cuchiu den man, purbando pa mata un cacho. A topa cu e cacho na sanger caba mientras un otro cacho tambe herida. A detene e persona aki, bou sospecho cu e tabata droga y pa maltrato di bestia.
Ora a yega Warda di Polis cune e nota mesora cu e no ta parce bon mentalmente, o sea cu e tabata instabiel. El a identifica su mes, pero ora a bay verifica a resulta cu su ID tabata falso. Via e sistema di imigracion a ripara cu el a yega Aruba na Februari 2017 for di Venezuela y nunca mas a regresa, Tambe a nota cu e no tin un permiso di estadia legal pa ta riba nos isla y riba dje…e tin solamente 17 aña di edad.
Durante investigacion di Polis, a sali afor cu e hobencita aki ta su so na Aruba, pues sin su mayornan. E lo ta kedando na cas di un Chines y parce e ta trahando tambe den forma ilegal riba nos isla. Den e caso a topa cu droga, no ta conoci si ta pa su uzo.
Bisiñanan a conta Polis cu tur anochi ta nota diferente auto ta buske di e cas y despues bahe bek. Nan ta sospecha cu e lo ta den negoshi di prostitucion. Tambe e actitud di e hoben den bario ta parce di un hende den baho mundo. E hecho cu a haya droga den su cas ta prueba cu entodo caso algo no ta corecto!
Ora a interoge na Warda di Polis, a punte kico ta e motibo cu e kier a mata e dos cachonan asina, el a contesta cu “e mester mata”. Cu e contesta aki y e forma con e ta papia y actua, a saca afor cu e no ta stabiel mentalmente. Cu e realidad ey riba mesa, Warda nos Costa tampoco no kier a tume, pa dos motibo. E ta actua agresivo y e ta menor di edad. Nan hefe ta suspendi caba pa e motibo y aunke, segun e trahadonan, Elio Blijden e sigui e procedura corecto, mirando cu toch a suspende, cu nan lo no “kima nan dede” cu e asunto aki y a opta pa lage pa Gobierno mes bay atende cune.
Polis a haye e ora cu un hobencita menor di edad, cu gana di mata pero cu no por bay cera, pa motibo di su edad. A opta e ora pa interne na PAAZ pa mira con nan por cuminsa yude.
Expertonan riba e tereno di admision y expulsion di stranheronan a splica cu Gobierno ta na un crusada dfificil aki. Ley ta bisa cu mester deport’e, pasobra Aruba no por bay tuma tur menor di edad cu mayornan stranhero ta bin laga atras riba nos isla. E unico cos ta cu e departamentonan concerni, manera Voogdijraad, mester asumi nan responsabilidad y tuma custodia temporal di e “mucha”. Mester drenta den contacto cu su mayornan y un representante di Voogdijraad mester bula bay Venezuela cu e mucha y entrege na su mayornan.
Den caso cu Gobierno opta pa no deport’e for di nos isla, e ora mester tuma custodia over y asumi tur responsabilidad di e mucha, cu su enfermedad y adiccion. Lo mester percura pa un luga pa e keda, por ehempel OC of Cas pa Hubentud. Pero como cu e ta agresivo, e por bira un reto pa e institucionnan ey.
Cu esaki kier mustra cu maneho di stranheria ta bin cu su retonan y tin biaha mester tuma decisionnan menos popular. Si no haci esey y stranheronan haya nos debilidad, anto tur mayor lo yega vakantie cu nan yiunan y sali laga nan atras pa Aruba atende cu nan.
Te ainda no tin un decision y mientrastanto e hoben ta na PAAZ boo gasto di Gobierno di Aruba.
