Hasta e publico den tribuna, amigonan di e socionan Ralph Maduro y Otmar Oduber mester a cuminsa hari. Esaki na momento cu abogado mr. Rossi Marchena a defende su cliente bisando cu berdad Otmar Oduber a bisa cu e tabata doño di Graphics & Beyond, pero cu mas bien el a kere e tabata doño, pero cu no ta asina.
Dialuna atardi a tuma luga e caso sumario cu Alpha Printing di Ralph Maduro a entama contra Headlines Group, cas editorial di 24ora.com, e website di noticia mas lesa na Aruba. Den su demanda e ta pidi Hues pa nos rectifica cu Otmar Oduber ta su socio-amigo y tambe pa rectifica cu su pareha Natasha Roga, siendo Presidente di Hunta di Supervision di Arubus, no ta forma ningun sorto di conflicto di interes pa su negoshi cu a strika mas di 272 mil florin e ultimo añanan aki cu plamento di sticker riba busnan di Arubus.
Durante tratamento di e caso, abogado Glendeline Croes cu a representa Headlines Group, a mustra prueba di lista di “vendors” di Arubus den cual e gasto di plakmento di sticker ta entre esunnan di mas halto di e compania. Tambe a mustra prueba cu Graphics & Beyond, cu a cambia di nomber por lo menos 5 of 6 biaha, semper scondiendo un letter of insiña, pa un rato tabata di casa di Otmar Oduber y pareha di Ralph Maduro. Es mas, e mesun Minister Otmar Oduber a bisa na Maart aña pasa den un conferencia di prensa cu e tabata doño di Graphics & Beyond, pero cu el a cere prome cu eleccion na aña 2009.
Cu esaki ta keda e impresion cu un compania cu e ex-Minister tabata doño di dje, ta pase pa su miho amigo y pa casualidad mayoria, si no ta tur su departamentonan of companianan bou su Ministerio, ta traha cu e compania aki. Asina a mustra Hues cu e dosnan aki ta asina pega cu otro, cu pa puro “casualidad” cu e compania Damox cu ta explota e logo di Aruba, ta(bata) situa den edificio di Drop and Nuts, di e suegra di Otmar Oduber!
Riba esaki e abogado, mr. Rossi Marchena, a bay purba defende dilanti Hues bisando cu como cu ta un compania chikito cu a caba di habri, cu e no por a haya niun otro adres na Aruba pa habri su compania cu no tabata na suegra di e Minister.
Tabata hopi obvio cu e abogado tabatin basta dificultad pa defende e ponencianan treci padilanti pa e Magistrado, pasobra simplemente e pruebanan, uitrekselnan di Camara di Comercio, anuncionan den corant y hasta e propio conferencia di prensa di Otmar Oduber no tabata na su fabor.
Ta bon pa accentua cu den nos articulo, 24ora.com nunca a bisa cu Natasha Roga a beneficia su pareha Ralph Maduro, sino a pone masha duidelijk cu e hecho cu e tabata Presidente di Hunta di Comisarionan di Arubus y su pareha ta haci negoshi grandi cu Arubus, cu e POR crea un percepcion y sospecho di conflicto di interes. No tin ningun buki di etica of di bon gobernacion cu lo aplaudi un formula asina, unda e mesun Natasha Roga, cu de facto awendia ta maneha Printshop y/of otro companianan na e mesun adres, tabata den un posicion di liderazgo den Arubus.
Corte lo evalua tur e pruebanan presenta den e caso aki y lo tuma un decision otro siman diaranson dia 20 di september 2017.
