Presidente di e Centro Nacional Electoral (CNE), Tibisay Lucena, a afirma diadomingo cu Presidente Nicolas Maduro a resulta “reeligi” den e eleccionnan convoca pa e Asamblea Nacional Constituyente (ANC). El a bisa cu Maduro a obtene 67,7% di e votonan. Scrutina 92% di e mesanan electoral, Lucena a informa cu a contabilisa 8.300.000 voto, di cual 5.823.000 a bay pa Maduro, sigui pa Henry Falcon cu, 1.820.552 y finalmente Javier Bertucci cu 950.000.
Un participacion hopi abao, si tene na cuenta cu den e eleccionnan presidencial pasa, na 2013, Maduro a obtene mas di 7 miyon di voto y Henrique Capriles a ricibi 200.000 voto menos. E abstencion ta calcula cu el a suma e 54%, segun datonan di CNE.
E resultadonan no a convence e candidato opositor Henri Falcon, kende a afirma cu ta desconoce e resultadonan di e eleccionnan presidencial cu a tuma luga diadomingo na Venezuela pa violacionnan reitera na e acuerdonan preelectoral di parti di e candidato na e reeleccion, Nicolas Maduro y a exigi e proceso ripiti e mesun aña.
“E proceso tin cuestionamentonan serio di nos parti (…) y sin duda algun e proceso falta di legitimidad y nos ta desconoce e proceso electoral aki categoricamente,” el a bisa den un rueda di prensa ofreci prome cu e resultadonan a bira conoci. “Nos no ta reconoce e proceso electoral aki como valido,” el a bisa.
Segun e lider di Avanzada Progresista, e acuerdo cu tur candidato a inscribi y cu tabata den parti e resultado di un proceso di dialogo cu e gobierno Venezolano na Republica Dominicana na principio di aña, no a cumpli cun’e y por lo tanto “inexistente.”
“Pa nos no tabatin eleccion, mester bin cu eleccionnan nobo na Venezuela, no ta un planteamento loke nos a bin ta haci, nos a bin pa haci un reclamo,” e candidato opositor a bisa, kende a plantea luna di October como un periodo pa celebra e comicionnan.
E acuerdo na cual el a referi “a plantea un conhunto di norma cu Gobierno tin cu atende pa e Conseho Nacional Electoral y den varios parti den e contienda,” el a bisa.
Cu e resultadionan aki, e actual Hefe di Estado, lo extende asina su gestion pa cumpli cu e periodo presidencial 2019-2025.
Sin embargo, Merca y Chile, ademas di e Grupo de Lima, a rechasa a proceso y a bisa di no ta reconoce e resultadonan. Maduro a bisa cu “e no ta importa” loke nan ta pensa di loke ta pasa na Venezuela.
