Awe mainta trempan Alto Comisario di Cuerpo Policial Aruba, den un comunicado di Cuerpo Policial number 505, a informa henter Cuerpo Policial cu desde awe 9 di augustus 2018 y pa un periodo di 6 siman, ta prohibi entrada di Errol E. Zebeda na tur edificio, autonan y terenonan di Cuerpo Policial Aruba y di Gobierno di Aruba. E motibo duna den e comunicado aki ta debi na un investigacion interno. Despues di nos pregunta na e departamento di Prensa di Polis, a confirma e suspension. E vocero di Polis a subraya cu “Cuerpo Policial ta para pa siguridad, servicio, integridad, vigilancia y disponibilidad. E pueblo mester por sinti su mes sigur y ,mester por conta cu experticio, ayudo profesional y e profesionalismo di nos organisacion policial”.
Errol Zebeda, te cu awe ainda tabata den e funcion di wnd. Hoofd Divisie Bedrijjfsvoering. Dicho funcion e ta ocupando pa hopi aña caba y ta encarga entre otro cu maneho di e propiedadnan di Polis, pues tanto oficinanan como autonan y otro materialnan cu Polis ta uza den nan trabou diario. Errol Zebeda a studia na Academia Policial na Appeldoorn-Hulanda, despues na Universidad de la Habana, Universidad Central de las Villas, na Academia Militar di Surnam y despues na Universidad di Aruba, unda el a logra su PhD den Organisacion. E ta un experto den Gobernacion, Maneho di crisis y administracion publico.
