Dia 7 di febrüari ultimo, pa di tres bia, siudadano Soraya Cova-van Nijen a organisá un evento pa rekoudá fondo. Meta di e eventonan ta semper pa hasi un donashon ku e fondonan ku e eventonan generá.
E biaha akí a skohe Fundashon Tur Mucha Mester Kome (TMMK) pa bin na remarke pa haña e donashon. E aktividat di ayera tabata ‘premiere’ di un pelíkula nobo. E públiko tabata konsistí di 250
dama ku tabata dispuesto pa aportá na e bunita kousa aki i alabes disfruta di un anochi plasentero den kompania di amiganan i konosínan. Sra. Jennifer Moesker (TMMK) a duna un presentashon pa splika mas di tokante di e projekto prome ku e film kuminsa.
Ku e montante rekoudá ayera nochi a bira posibel pa Fundashon TMMK adoptá un skol mas ku lo partisipá e aña aki den e programa di alimentashon. Sigur sigur un logro pa aplaudí.
Fundashon Tur Mucha Mester Kome a lanta na mei 2017 i a lansa un proyekto piloto kaminda ta duna muchanan di shete skol ku ta bai skol sin kome i ku tin problema struktural ku alimentashon,
kuminda balansá tres biaha pa dia i 7 dia pa siman (wikènt i fakansi tambe).
Fundashon TMMK ta traha ku otro organisashonnan manera Fundashon Duna Mucha un Man (Lions). Di e forma aki nos ta yega hopi mas lihé sosteniendo otro ku e meta prinsipal pa tur mucha kome.
Union ta hasi forsa!
Lo tin hopi mas evento e aña aki kaminda por kontribuí. Ban p’é pasó falta míles di mucha más!
Pa mas informashon chek e website www.turmuchamesterkome.com of via FB.
