Gezaghèber tòg ke introdusí screening kandidatonan pa diputado

0
50

Den un karta dirigí na e miembro di Konseho Insular sra Maruga Janga ku kopia pa e otro miembronan di e órgano aki,gezaghèber Edison Rijna ta indiká ku ela buta e promé pasonan pa yega na formulashon di un konsepto di protokòl tokante posibel sospecho di violashon di integridat di parti di un miembro di Konseho Insular òf un diputado. Gezaghèber Rijna ta skirbi aserka ku e ta bai investigá si esaki por bai huntu ku un Deklarashon Tokante Kondukta, un asina yamá VOG, pa personanan ku ta karga outoridat polítiko. Esaki ta enserá tambe un profil di ‘screening’ pa tur personá ku ta aspirá pa bira representante di pueblo òf diputado. Pa por salbaguardiá integridat di potensial representantenan di pueblo i diputadonan mas mihó posibel mester skohe pa un profil di ‘screening’ den kua ta evaluá un grado haltu di integridat.
E mensahe aki a bini djis algun dia despues ku frakshon di MPB den Konseho Insular pa medio di konsehal Renata Domacassé a entregá un moshon den kua frakshon di MPB ta pidi pa instruí gezaghèber pa implementá un proseso di análisis di riesgo di integridat pa tur persona ku kier bira diputado. Ku otro palabra, MPB su proposishon tabata pa introdusí un tipo di ‘screening’ pa kandidatonan pa bira diputado. E moshon no a pasa pasobra koalishon konsistiendo di Maritsa Silberie, Esther Bernabela i Shanoushka Raphaela di UPB sostené pa Robbie Beukenboom i Maruga Janga di PDB a vota kontra.
Awor ku nan a risibí e karta aki di gezaghèber Edison Rijna e miembronan di frakshon di MPB den Konseho Insular ta sumamente kontentu ku gezaghèber si a mira e importansia i e nesesidat di e proposishon di MPB. Frakshon di MPB ta spera sinseramente ku kanando e trayekto ku gezaghèber tin intenshon di implementá, ‘screening’ di kandidatonan pa e.o. diputado ta bira realidat, pasobra ‘screening’ di diputado lo yuda ku Bon Gobernashon pero tambe ku polítika nobo. Esaki no solamente lo sòru pa ekskluí personanan ku pa un òf otro motibu no ta den e posishon pa kumpli ku e eksigensianan di un profil di ‘screening’ pa por okupá un funshon gubernamental òf un funshon komo mandatario, pero e medida nobo aki alabes lo ta un protekshon di e balor i e honor di e funshon riba su mes.

Comments

Upsize Earn Points and Win
WEB
Banco di Caribe

comments