E Derecho di un Autor

0
81

Oficina di Propiedad Intelectual di Aruba ta celebra cu 30 aña pasa a habri su portanan
oficialmente riba e fecha di 17 di november 1987. E Director di e tempo ey, sr. Frank
Croes a encabesa tur trabou riba e leynan nobo cu mester a bin pa cuminsa cu e
registracionnan.

WEB
Wendys
Banco di Caribe

E ‘Aniversario di Perla’ di OPI ta wordo celebra cu un ‘Open Dag’
diabierna awo dia 17 di november 2017 for di 9’or di mainta pa 4’or di atardi. Publico ta
keda cordialmente invita pa pasa y haya informacion riba e diferente servicio cu OPI ta
ofrece.
Ta importante pa comunidad ta consciente pakico ta bon pa registra obranan. Ya for di e
momento di creacion di un obra, esun cu a crea esaki ta haya e ‘Derecho di Autor’.

Kico ta derecho di autor?
Conforme cu Ley di Derecho di Autor, aki ta trata di un derecho exclusivo di cada
creador di un obra di literatura, ciencia of arte pa publica y produci su obra, of permiti
otro haci esaki. Tur loke cu wordo publica, sea electronicamente of no, tin e derecho di
autor. Generalmente un obra ta haya e derecho di autor na momento di e creacion. Pues
na ora cu e obra ta inicia y bon mira, no ta obligatorio pa aplica pa haya e derecho di
autor. Automaticamente Ley di Derecho di Autor ta duna e autor di un obra su derecho.
E derecho di autor ta un derecho pa bida largo di e autor, +50 aña despues cu e fayece.
Despues di fayecimento di e autor, e derecho di autor ta pasa automaticamente pa su
herederonan.
Registracion
Ora cu un autor ta registra su obra, e ta ricibi un certificado di registracion. E certificado
aki ta un evidencia, den caso cu tin duda kende ta e berdadero autor di e obra. Ora un
obra tin derecho di autor, tercera persona no por haci negoshi cu e obra sin e permiso di e
autor. E intencion di Ley di Derecho di Autor ta pa proteha e autor, mientras cu e ta
promove su creatividad y intercambia su ideanan na un manera reglamenta. Den curso di
aña hopi autor consciente di e balor di derecho di autor, a acudi na Oficina di Propiedad
Intelectual, situa na Adriaan Lacle Boulevard 3, p’asina registra nan obra y ricibi e
certificado di registracion. E certificado di registracion ta duna e autor proteccion
internacional. Costo di registracion ta Afl. 35,- y por registra te na un maximo di 10 obra
pa certificado.
Conscientisacion
En conexion cu su 30 Aniversario, OPI ta conscientisa comunidad pa reflexiona y realisa
riba e trabou cu un autor tin pa crea obranan unico den e mundo aki. Ta sumamente
importante tambe, pa cada autor bira mas consciente di su creatividad valioso y pa e
registra su obranan.
Director di Oficina di Propiedad Intelectual, Sr. Robert Kelly y su personal ta invita
publico pa pasa diabierna awo y bishita e “Open Dag” na Adriaan Lacle Boulevard 3.

Comments

comments