DOW lo bay pone borchi pa no landa ni pisca den Bubali Plas

0
135

Algun dia pasa por a tuma nota den noticianan di polis cu a drenta un melding caminda cu a bin haya hende ta pisca den Bubali Plas. Algo cu sigur nos no ta custuma cun’e. Por tabata trata aki di turistanan cu no sa cu esaki no por.

Wendys
Banco di Caribe
WEB

Marlon Croes, director di DOW, durante un conferencia di prensa, a comenta cu DOW a tuma e iniciativa cu lo bay pone borchi na Bubali Plas. A haci peticion pa fabrica nan y asina cu nan ta fabrica, lo bay instala nan, pa asina preveni cu hende bay landa y/of tambe pisca den e plas aki

Laga e plas para

Basicamente Bubali plas ta un saliña cu despues cu e planta di purificacion a cuminsa opera na 1972, el a crece bira un structura traha (manmade structure) cu a crece loke ta awendia. Unda cu tin awa tin vegetacion, tin parha, tin reptil, tin pisca. Esey a crece y bira loke ta awe. Naturalmente, ora cu ta deal cu diferente decada cu ta basha awa purifica den dje, bo ta haya coleccion, sedimentonan ta bay sinta den dje cu por ta toxico. Den e caso aki tin metalnan pisa. A laga un consultant Hulandes haci un estudio riba e contenido di Bubali Plas y nan a caba cu e rapport ey na 2015 y nan a detecta cu tin metalnan pisa den e fondo. Pero e no ta di un contenido asina halto cu e ta dañino. Pa precaucion pa preveni cu bo ta landa den e awa aki y cu bo ta pisca den e awa aki.

E ora DOW ta tuma medidanan di prevencion pa haci esey. E conseho di e consultant ta, laga e situacion manera e ta. No bay touch cun’e pa bo por disperce e materialnan toxico aki.

Ta spera cu pa un of dos siman e borchinan aki ta buta.

Segun Marlon Croes, a discuti ki lenguahe lo wordo uza. Na ultimo a dicidi pa uza pictograma. Nan ta pone den e caso aki piscamento cu un cruz den dje cu pa tur hende ta comprendibel.

Riesgo

Door cu a detecta cu den e plas tin metalnan pisa, aunke cu e nivel no ta peligroso, pero toch nan kier preveni e riesgo wordo exponi na hende. Ta conseha pa no haci lo posibel pa sak’e tampoco, sino lo por contamina e area. Naturalmente pisca ta conoci pa absorba metalnan den su sistema. Por ehempel mercurio ta un di e metalnan cu e ta absorba y cu bo por shuata cun’e. Den e caso aki, ta conseha y pesey mes preventivamente ta pone e borchi pa no landa y no pisca den e area aki.

Ora cu awa yena e area

Marlon Croes a sigui splica cu nan ta monitor e area aki, pasobra e ta un wetland. E ta e punto mas abao cu ta colecta tur e awanan cu ta bin di Palm Beach, e area di Noord, full Alto Vista, Sabana Liber, ta baha bin caba eyden y e ta un water retention pond y tin cu percura pa e haltura di awa no yega asina halto, cu e ta bay molestia e bario di San Miguel y e bario di Keito. Hasta e bario di Palm Beach lo bay sufri di dje. Pa por evita esey, a establece un haltura maximo cu por acepta den e Bubali Plas. Prome cu e yega eynan of ora e yega, ta habri e sluis, baha e cantidad di awa bek pa e no surpasa esaki, sino e ta causa molester pa e vecindario.

Metalnan pisa

Ora cu ta deal cu awa di riolering, via leidingnan e ta bin y tin hopi compania, por ehempel di Welder, compania di Laboratorio di antes, manera labamento di potret, tabata uza cierto kimiconan y tabata wordo deposita den e rioolleiding y e ta transporta su mes y ta yega na e planta. Ora cu e yega e planta, e kimiconan aki ta stroba e proceso biologico cu tin cu tuma luga. Y ora cu caba di purifik’e, ta loos’e den e plas y lo keda deposita eyden.

Comments

comments