Dangui Oduber: E proximo Gobierno cu asumi su responsabilidad no lo sigui cu e plan di AVP

0
1983

A mustra Dangui Oduber di MEP cu Bushiri Hotel ta bay awor y Gobierno cu ta bay a bisa cu e ta bira un beach publico  y cu lo wordo duna bek na pueblo, DOW tin un plan, etc. Parlamentario Dangui Oduber a comenta cu na momento cu tin un Gobierno nobo, tin un otro vision. Logicamente esey no tabata forma parti di e vision di MEP. E tabata vision di Gobierno di AVP. Tin un signatura nobo cu ta di MEP, POR y RED y a anuncia durante periodo di campaña caba, cu e plan ta pa bin cu un boutique hotel, caminda cu Bushiri hotel ta y entre Bushiri Hotel y Tamarijn, lo bin cu un beach publico pa e comunidad di Aruba haci uzo di dje. E plannan no ta mucho diferente. Unico diferencia ta cu partido AVP den su plannan tabata tin un hotel tambe, cual logicamente Mike Eman no a anuncia ora cu el a bisa cu e ta bay basha Bushiri Hotel abao. Nan tabata di bin cu un sporthotel na Bushiri y haci e otro parti un beach publico. Contrario na nan vision, a bisa cu lo bin cu un boutique hotel na Bushiri y entre Bushiri y Tamarijn haci’e un beach publico. E proximo gobierno cu asumi su responsabilidad nan lo no sigui cu e plan di AVP y esun di e gobierno nobo lo wordo ehecuta.

Banco di Caribe
Wendys
WEB

 

Masterplan

E parti di waf tambe APA a presenta un plan ambicioso. E masterplan aki lo wordo re-evalua? E masterplan aki a wordo discuti ultimo añanan. E masterplan aki ta algo cu a wordo discuti pa e ultimo añanan. Parlamentario Dangui Oduber tabata forma parti di e comision di infrastructura, y a haya un presentacion di director di APA.

Na e momentonan aki, Parlamento no ta na altura kico ta e contenido precies di e masterplan aki, pero a anuncia si caba cu e masterplan aki sigur lo wordo evalua. Mescos ta conta pa e caso di Bushiri cu Gobierno di AVP tabata tin un vision cu Bushiri y e Gobierno nobo tin un vision diferente. Mescos ta conta pa e masterplan aki cu no necesariamente ta di acuerdo cu e masterplan cu lo wordo presenta. Prome stap ta pa haya un presentacion di e masterplan aki y despues di esaki lo haci un evaluacion si ta di acuerdo si of no. Dado caso no ta di acuerdo cu e masterplan aki, mester diseña un masterplan nobo pa henter e area aki, pasobra tin un signatura di Gobierno y tin un vision diferente cu e Gobierno saliente. Ta cuestion di haya informacion un biaha mas, haya un presentacion di e director di APA y tur esnan cu tabata envolvi den e masterplan aki, pa wak si e proximo Gobierno ta di acuerdo cu e plan cu tin riba mesa na e momentonan aki.

Tin hopi discusion cu si ta bay mishi cu e waf, si ta bay amplia esaki, si ta bay bin cu condominium, cu si ta bay bin cu hotel. Esey informalmente a haya informacion cu esey tabata e caso di e masterplan aki, cu nan kier haci’e un combinacion di linear park cu algun condominium y algun hotel y despues laga e area habri cu bista, pa esnan cu ta haci uzo di linear park, tin un bista habri riba lama. Concretamente no sa kico ta e contenido. Pesey ta importante pa haya un presentacion prome, pa prome cu tuma un decision, kico ta bay ta e destinacion di un area. Pasobra ta un area sumamente bunita, ta un area di 30 mil meter cuadra di beach front cu por conoce cualkier desaroyo. Por pensa riba parke di recreo, entre otro. E ta un area bunita pa desaroya, pero ta cuestion di reuni cu tur esnan envolvi tambe, laga comunidad tambe duna un opinion kico nan kier mira e area aki bira cu abo como Gobierno unilateralmente ta hisa benta cu desaroyo cu no ta biba cu comunidad, Dangui Oduber a expresa durante e conferencia di prensa.

 

Comments

comments