Programa bon yen pa seminario Finlandes riba ‘Solushon i aplikashonnan duradero’

0
13

E seminario dia djaluna 20 di novèmber den oula di universidat en konekshon ku e di 100 aniversario di independensia di Finlandia, konosé un programa yen pa e mainta entre 9 i 12 or.
Señora Helga Mensing komo kònsel honorario di Finlandia na Kòrsou i den su kalidat di anfitriona lo yama bon biní na tur presente. Minister Suzy Camelia-Römer di Salubridat, Medioambiente i Naturalesa tambe ta bai dirigí palabra na e oudiensia, siguí pa e embahador di Finlandia pa área di Karibe Jukka Pietikäinen kumpliendo ku petishon di e embahada di Finlandia na Den Den Haag pa e efektuá e apertura ofisial di e seminario.
E promé orador ta señor Adam Shanks di e kompania Finlandes Vaisala Corporation ku a suministrá Servisio Meteorológiko un radar di tempu nobo i moderno. E lo papia a base di e case study di e Vaisala Weather Radar tokante ‘Smart Investment Helping Curaçao Achieving Sustainability’.
Despues atraves di skype señor Venkata Gandikota, fundador i presidente di e NGO The Nordic Frugal Innovation Society, lo toka ‘Sustainable Economic Growth via Frugal Innovations’. Tambe via skype señornan Eero Lehtovuori i Business Developer Martti Mäyry di e instansia Finlandes Finnish SME Finbin lo elaborá riba ‘A Family Business Leading the Way in Smarter Public Environments’. For di Finlandia lo skype tambe señornan Arttur Kulvik i Imran Ahmed, respektivamente CEO i Business Developer di Finnish SME Solnet lo papia di ‘Renewing Solar Energy by a Lean Supply Chain and Internet of Things’.
E último orador ta lokal. Basá riba su ekspertisio amplio na Kòrsou i den region Ir. Karel Tujeehut lo formulá un kontesta riba e pregunta ‘Is the Caribbean a Paradise for Renewable Energy?’. Ta sera e mainta ku un diskushon ku un pènel dirigí ku e embahador Finlandes Jukka Pietikäinen.
Preparashon di e seminario ta tuma lugá den koperashon estrecho ku e embahada Finlandes na Den Haag i ku respaldo di e Ministerio di Salubridat, Medioambiente i Naturalesa (GMN). Partisipashon ta grátis pero ta rekerí pa interesadonan mèldu di antemano na [email protected]

Comments

Wendys
WEB
Banco di Caribe

comments