“State of the Economy” prome trimester di 2017

0
94
OLYMPUS DIGITAL CAMERA

Awe Banco Central di Aruba (BCA) ta publica e asina yama “State of the Economy” pa e di prome trimester di 2017. E publicacion aki ta provee un sinopsis di e desaroyonan economico local y internacional pa e periodo aki. E puntonan mas importante ta wordo presenta abou, incluyendo un resumen di e indicadornan economico principal.
Den e prome trimester di 2017, indicadornan economico ta señala inicialmente un recuperacion di e economia cu e desaroyo alentador di e sector turistico como e motor principal. Ingreso turistico y hotelero a subi indicando cu e expansion di e mercado Mericano tabata suficiente pa cancela e efectonan negativo di e derumbe di e mercado Venezolano. Di acuerdo cu varios indicador, inversionnan di e sector priva a accelera. Importacion di metalnan basico, machine y aparatonan electrotechnico a expande substancialmente. Al contrario, e cantidad di permiso pa construccion duna a cay (-11,8 porciento), aunque cu e balor total di e permiso a bira casi dobel (+97,9 porciento). Mientrastanto, fiansa pa construccion di cas a mustra un 0,7 porciento subida, pero hipotecanan comercial a cai cu 1,3 porciento.
Indicadornan di consumo ta sigui mustra un imagen diverso den e prome trimester di 2017. Credito na consumidor a indica un caida di 2,3 porciento den e prome trimester compara cu December 2016. Datonan di entrada di belasting, di otro banda, ta señala un crecemento den consumo. Entrada di BBO y impuesto riba importacion a resulta den crecemento di 9,6 porciento y 2,9 porciento, respectivamente, parcialmente causa pa mas esfuerso den coleccion. Entrada di accijns a crece cu 48,9 porciento carga pa un subida signficante riba accijns di tabaco (pa e pre-compra di stampia) y tambe pagonan atrasa relata na accijns riba gasolin. Sin e efectonan incidental, ta calcula cu entrada di accijns toch lo mustra un crecemento substancial.
Na fin di e prome trimester di 2017, e deficit di gobierno (incluyendo cambio den pagonan atrasa) tabata Afl. 93,4 miyon, financia principalmente pa un emision di bono di gobierno riba e mercado domestico. E debe total di gobierno a yega na Afl. 4.090,8 miyon, un subida di Afl. 65,5 miyon den e periodo bou repaso. Consecuentemente, e debe den porciento di e PDB ta surpasa e nivel di 85 porciento, yegando na 85,4 porciento.
Den e prome trimester di 2017, e balansa di pago a registra un surplus di Afl. 41,7 miyon compara cu un surplus di Afl. 103,1 miyon den e prome trimester di 2016. E surplus den e prome trimester di 2017 ta debi na un balans positivo den cuenta coriente cu a wordo rebaha parcialmente pa un deficit den e cuenta di capital y di finansa. Reservanan oficial a realisa un crecemento chikito den e prome trimester di 2017 (+Afl. 18,8 miyon). Consecuentemente, reservanan total (incluyendo diferencianan den revaluacion) a alcansa Afl. 1.952,7 miyon. E tasa di cobertura di importacion a yega 5,4 luna, cu ta 0,2 luna mas abou cu na e fin di e prome trimester di 2016.

Comments

Banco di Caribe
WEB
Wendys

comments