Teknologia i koperashon ta resaltá durante biahe di Minister Girigorie

0
56

Minister di Hustisia señor Quincy Girigorie tabata den eksterior pa un biahe di trabou di djaweps 21 di sèptèmber pa 2 di òktober último. Señor Girigorie a biaha pa China pa partisipá na e di 86 Asamblea General di Interpol (86 th ‘Interpol General Assembly’) na Beijing.

beach tennis
Wendys
WEB
Banco di Caribe

Tema di e Asamblea General aki tabata: ‘Taking a stance on global security’ (Tuma un posishon pa ku seguridat global). Minister ta mira bèk riba un biahe eksitoso kaminda entre otro a logra hopi pa loke ta trata desishonnan en kuantu Interpol, krea kontaktonan ku por ta benefisioso pa nos pais i tuma nota di posibilidat i efektividat di implementashon di teknologia pa kombatí kriminalidat. E delegashon di Kòrsou ku a kompañá señor Girigorie a konsistí di Sekretario General di Ministerio di Hustisia señora Desiree Lai-Promes, Fiskal Mayó di Ministerio Públiko señor Heiko de Jongh, hefe di Interpol señor Norbert Minguel, hefe suplente di Interpol señor Prisco Francisca, i hefe interino di VDC señor Aloysius Pole. E asamblea a konta ku  partisipashon di mas ku 1000 miembro di delegashon entre nan 30 minister di Seguridat,
Asuntunan Interno i/òf Hustisia di 156 pais ku ta miembro di Interpol. Importansia di koperashon Na apertura di e Asamblea General e presidente di Interpol señor Hongwei Meng a para ketu na importansia di koperashon entre nashonnan. El a enfatisá ku komo ku seguridat ta e nesesidat básiko di sobrebibensia humano, ta di sumo importansia pa polisnan di diferente pais yuda otro den kombatimentu di kriminalidat i asina kada pais yuda su mes pa logra establesé seguridat nashonal. Sekretario General di Interpol, señor Jurgen Stock tambe a indiká den su spich di apertura ku miéntras kriminalnan i teroristanan ta sigui buska  burakunan den e sistema di seguridat pa por kometé krímen, e kadena hudisial mester keda fleksibel i usa tur rekurso disponibel pa atendé ku e atakenan aki.

Fortifiká lasonan
Durante e Asamblea General, delegashon di Kòrsou a hasi uso di e oportunidat pa hasi kontakto i fortifiká lasonan ku paisnan importante den region den kuadro di kombatimentu di kriminalidat. Minister Girigorie a hiba kombersashonnan fruktífero ku entre otro delegashon di Venezuela i Cuba. Tambe a elaborá ku Colombia riba posibilidat pa fortalesé e koperashon eksistente riba tereno di formashon polisial. Durante e konferensia delegashon di Moldova a tene un bankete pa sera konosí i buska sosten pa e pais bira parti di Komishon Ehekutivo (Executive Commitee) di Interpol. Aki Minister Girigorie a haña oportunidat di sera konosí i kombersá ku Minister di Asuntunan Interno i Hustisia di Moldova, señor Alexandru  Jizdan.Durante e Asamblea General tabatin 18 resolushon ku e paisnan miembro por a vota riba dje. Un di e resolushonnan ku tabata interesante pa Kòrsou ta kaminda a vota riba introdukshon di un sistema nobo pa aseptashon di miembresia den futuro i ku lo no aseptá paisnan ku no ta independiente mas komo miembro di Interpol. Kòrsou i Aruba sinembargo, ku tin un miembresia ku pleno derecho pa mas ku 50 aña i ku ta e úniko paisnan na mundu ku un ofisina ofisial (independiente) di Interpol, ku ademas tin voto den Asamblea General,
siendo ku nan no ta paisnan independiente, a logra mantené e posishon aki. Inspur Durante di su estadia na China, Minister Girigorie huntu ku Fiskal Mayó de Jongh a bishitá e ofisina prinsipal di e kompania Inspur LTD ku ta situá na Jinan i ta enkargá ku e proyekto di kámaranan di seguridat na Kòrsou. Aki a kombersá tokante kontinuashon di e proyekto di kámara na Kòrsou i a papia ampliamente riba posibilidatnan teknológiko pa prevenshon i kombatimentu di krímen. Aporte di yu di Kòrsou E biahe ku a tuma lugá no tabata dediká na e konferensia di Interpol i bishita na Inspur so.

Na Hulanda miéntras ku e delegashon tabata di tránsito, minister Girigorie a hasi un bishita na Minister Plenipotensiario señor Anthony Begina kaminda a trata diferente tema manera entre otro relashonnan riba tereno di Hustisia den
Reino, ròl di Kas di Kòrsou komo fasilitadó den e relashon entre Ministerio di Hustisia di  Kòrsou i Ministerio di Seguridat i Hustisia di Hulanda i posibilidat pa siudadanonan yu di Kòrsou bibá na Hulanda duna un aporte na desaroyo di Kòrsou. Tambe Minister a kombersá ampliamente ku entre otro Alto Inspektor di polis Sidney Mutueel, un yu di Kòrsou bibá na Hulanda ku mas ku 27 aña di eksperensia den trabou polisial kende aktualmente ta traha komo dosente na Politieacademie na Apeldoorn, riba posibilidat pa yunan di Kòrsou ku ta
miembro di kuerpo polisial di Hulanda duna un aporte na Kòrsou. Minister Girigorie ta mira bèk riba un biahe fruktífero kaminda fortifikashon di lasonan tabata sentral i el a haña un bista amplio di diferente posibilidat teknológiko ku por yuda nos pais den kombatimentu di krímen.

Comments

comments