SIGE a duna homenahe na baluarte Aminta Sprockel

0
149

Djaweps anochi SIGE a introdusí e produkto Siklo di Informashon Aminta Sprockel ‘Stimulashon Trempan den Bario’ di forma ofisial na un sala yen di mas ku 60 mayor i edukadónan. A dediká apertura di e proyekto aki na sra. Aminta Sprockel kende ta e fundadó prinsipal di Stimulashon Trempan. A para ketu na e echo ku Stimulashon Trempan ta unu den tantísimo proyekto mas ku sra. Aminta Sprockel a sa di inisiá, en partikular, pa muchanan ku ta enfrentá reto den nan desaroyo aki na Kòrsou. Ademas, SIGE a duna rekonosimentu na e tim kompletu ku a sa di sostené Stimulashon Trempan for di prinsipio te ku awor den su di 41 aña di eksistensia.
Presidente di SIGE sr. Aubert Wiels a habri e anochi enfatisando e importansia i nesesidat di stimulashon trempan awendia. El a splika ku den e tempu di awor dos kos fundamental ta laga di deseá; kariño i edukashon na kas. Seguidamente direktora di SIGE sra. Solange Olaria a rekapitulá desaroyo i momentunan bon i di reto ku Stimulashon Trempan a pasa aden for di momentu ku e tabata djis un idea i soño den man di sra. Aminta Sprockel. Despues di mas di 40 aña di eksistensia di Stimulashon Trempan e por a konkluí ku apesar di tur e pruebanan ku e departamentu a enkontrá, e fundeshi ku sra. Aminta a laga atras ta duru manera di betòn. Finalmente, el a enfatisá ku en bèrdat muchanan mester bira i keda un prioridat di pais Kòrsou.
Pa sra. Aminta mes tabata un goso pa mira fruta di un soño ku el a bringa p’e krese i bira loke e ta awor. El a splika ku 40 aña pasá no tabatin asina tantu logopedista manera aworakí, i ku tabata hopi difísil pa mayornan risibí yudansa nesesario pa muchanan ku tin reto den nan desaroyo. Sinembargo, awor ta bayendo mas serka di e mucha ku tin nesesidat di stimulashon trempan, esta den su bario, pa asina fasilitá mayornan i pone e mucha su desaroyo komo prioridat.
E departamentu Edukashon Preskolar di SIGE tin e meta prinsipal di kontribuí na desaroyo positivo di tur mucha, na un edat mas trempan posibel, di akuerdo ku nan potensial. Netamente den e kuadro aki a introdusí e Siklo di Informashon den Bario Aminta Sprockel. Djaweps awor lo sigui ku e siklo di informashon i lo trata e promé tópiko “Importansia di Stimulashon Trempan”. Na luna di novèmber SIGE lo kontinuá su gira ku ripitishon di e mesun siklo pa área p’ariba. Interesadonan por registrá i inskribí te ku djamars 31 di òktober na SIGE pa e di dos siklo di informashon aki, na Groot Davelaar 22-23, di djaluna pa djabièrnè, entre 8:00 or pa 12:00 or i 14:00 or pa 17:00 or. Pa mas informashon por tuma kontakto ku SIGE na 747-2700 òf 738 6570.

Comments

Wendys
Banco di Caribe
WEB
wendys banner

comments