Prome Minister Mike Eman a cuminda, gradici y encurasha esnan di Arumil na St. Maarten

0
179

Entre e diferente tarea cu e pone pa haci durante e bishita cortico na St. Maarten, Prome Minister Mike Eman no kier a keda sin pasa cerca e marinonan di Arumil. Premier Eman a verifica personalmente cu nan ta den bon condicion, pero tambe a transmiti e danki enorme cu ta bin di parti di pueblo di Aruba y St. Maarten pa e trabou cu nan ta haciendo. “Tur dia, nos no por caba di bisa con orguyoso nos ta di nos mariniers local. Nos a mira cu nan ta traha cu hopi dedicacion,” asina Eman a bisa, compartiendo e elogio ey cu Polis y miembronan di Cruz Cora di Aruba cu tambe ta aya.

Banco di Caribe
Wendys
WEB

Mescos cu tabata e caso algun aña atras, na e teremoto di Haiti, Defensa Hulandes ta integra Arumil den e esfuerzonan y esaki a duna bon resultado y elogio pa nos hendenan. For di prome cu e horcan a yega, Aruba ta trahando cu nos rumannan den Reino y nan peticion pa ayudo. Cu aprobacion di Hulada a traslada un grupo di Arumil net prome cu horcan Irma a yega y asina nan tabatey for di prome instante pa yuda den e recuperacion. Tambe ta inclui seguridad, cu ta conoci tabata un reto den e prome oranan despues di e horcan, yuda distribui alimento y articulo na esnan den necesidad y e trabounan di limpieza.

Durante e bishita, Prome Minister Mike Eman a topa cu Jeremiah Dijkhoff kende tabata yegando for di patruyahe. E ta na St. Maarten for di dialuna siman pasa y a experiencia e horcan hunto cu ciudadanonan den un shelter. Apesar di momentonan horibel, nan a logra yuda otronan. Inmediatemente despues e trabou a cuminsa y Dijkhoff a splica cu “Awo ta hopi mas trankil, caya ta mas trankil, menos hortamento cu eseynan tambe.”

Jean Marc Trimon di su banda a splica cu hendenan ta basta contento cu nan t’ey pa yudanan dor cu ta papia Papiamento y ta aprecia cu por comunica miho asina. “E ciudadanonan cu ta biba akinan mes na St. Maarten ta aprecia masha hopi cu nos a bin yudanan. Ora nos ta para na roadblock nan ta gradici nos, bisa nos hopi danki paso nan ta den temponan dificil.”

Nan tur ta kedando na un hotel, pero nan situacion ta leu di ta luhoso manera Trimon ta splica. Nan ta haya un racion di cuminda pa 24 ora cu ta inclui bleki di tuna y crackers. E luga no tin coriente ni tampoco awa y ta usa boter di awa pa bebe y cushina. Nan tabata kedando prome na un scol, pero mester a sali pa trabounan wordo haci y purba restablece les pa e muchanan. Ora di bishita di Prome Minister, Trimon a caba di yega e dia prome for di su warda na Prison caminda mester cuida pasobra horcan a basha un di e murayanan di e prison abou.

Otro integrante di Arumil cu Prome Minister Mike Eman a haya chens di topa y combersa cune ta Reinier Corvacho. E ta un Corporaal cu a splica con e grupo di Arumil a wordo reparti entre e tareanan mas importante manera proteccion di prison, na aeropuerto, di nan sede mes y tambe pa Su Mahestad Rey Alexander ora cu el a bishita algun dia atras. “E patruyanan ta core constant y ta 2 pa 4 ora riba caya, despues ta bin aden pa rust 4 pa 6 ora y otro grupo ta bolbe subi caya; asina ta keda rouleer pa tin un descanso y pa nan por ta cla ora di accion.”

Esnan di Arumil a haya oportunidad pa contacta nan famia na Aruba, cual a haci tanto nan como e famia mas trankil. Asina mes, nan ta admiti cu esey no ta e parti di mas importante. “Nos sa pakico nos ta akinan, cu nos tey pa yuda. Nos no tin un dia specifico pero nos tin den nos cabes cu nos lo tey pa un periodo largo pa yuda,” asina e Corporaal a finalisa bisando.

Consciente di e trabou importante cu nan ta haci na momento dificil asina, pero tambe pa e interes den nan capacidadnan regularmente, Gobierno di Aruba ta trahando pa sincronisa e fase ora cu nan tempo den Arumil ta caba, pa asina e soldatnan aki por adkiri un funcion importante den cual por sigui sirbi pueblo di Aruba y unda cu tin mester.

Comments

comments