Presidente di Parlamento Europeo kier sosten pa Sint Maarten

0
200

E Presidente di Parlamento Europeo ta haya tambe cu e parti Hulandes di Sint Maarten, mester haya sosten financiero di Union Europeo pa reconstruccion despues di e daño cu horcan Irma a ocasiona.

Wendys
WEB
Banco di Caribe

Antonio Tajani ta bay urgi na e Presidente di e Comision Europeo pa yega na un solucion.

Door cu e parti Hulandes di Sint Maarten, tin un otro status estatal cu esun Frances, oficialmente e no por bin na remarca pa ricibi Fondo di Solidaridad di Union Europeo. “Mi ta haya cu mester yuda ciudadanonan aki, cu mag di vota na e eleccionnan Europeo y cu a pasa den e mesun calamidad cu nan bisiñanan Frances,” segun Tajani.

Segun Minister Koenders di Asuntonan Exterior, a avisa e Comision Europeo pa ta flexibel y pragmatico cu e reglanan. Parlamentarionan di Union Europeo di PvdA, CDA y VVD tambe a haci un peticion na e comision aki pa mustra mas flexibilidad.

Parlamento Europeo lo debati diaranson anochi na Straatsburg riba e cuestion. D66 y ChristenUnie tambe lo bin na palabra, Juan David Yrausquin, Minister Plenipotenciario di Aruba ta presente “a base solidario” pa asina duna sosten na e peticion.

Aruba, mescos cu Corsou, tin e mesun status cu Sint Maarten, pero e chens cu Aruba pasa den algo manera Sint Maarten a pasa aden, segun Yrausquin ta hopi mas chikito. “Nos tur ta ciudadanonan Europeo y Hulandes. Esaki no ta cla pa tur hende. Loke a pasa na Sint Maarten ta teribel. Nan mester tur ayudo posibel. E lo ta straño si nan no por haci uzo di e fondo aki”, asina Juan David Yrausquin a termina bisando.

Comments

comments