Fundacion Movemiento ta Bida ta organisa workshop y Congreso riba “Active Ageing”

0
20

Prevencion y Movecion ta esencial pa asina por tin un bida saludabel. Segun Rudy Leysner, Presidente di Fundacion Movemiento ta Bida nan ta trahando riba “active ageing” cu ta encera actividad fisico of trabou na cas pa yuda bo curpa ta activo despues di cierto edad.
Na e edad di 50 aña ta bon pa bo cuminsa pensa cu bo ta bay pasa den un proceso di envehecimento y ta importante pa pensa riba bo salud. “Mas activo bo ta for di un edad jong, mas bo ta bay tin e beneficionan despues.” Pesey Fundacion Movemiento ta Bida ta organisando un congreso riba “active ageing” cuminsando 13 di October proximo. Lo bay cuminsa cu un pre-congreso cual ta un workshop caminda lo bay papia riba nutricion, maneho di stress, mobilisacion, etc. Total lo tin 5 diferente workshop y pa cada workshop lo tin luga pa 25 persona. Dia 15 di oktober, na Cas di Cultura lo tuma luga e congreso unda lo tin participacion di 7 orador internacional y 4 local. Durante e congreso ta bay papia riba diferente topico manera envehecimento, con pa keda activo, con pa traha cu hende grandi, comunidadnan cu ta biba den harmonia, maneho di stress, etc. Rudy Leysner a agrega cu Club Kibrahacha a haci un investigacion riba e deseonan di hende grandi y den ki actividadnan nan kier participa. E resultadonan di e investigacion aki tambe lo wordo presenta durante e congreso. Envehecimento ta un proceso cu nos tur lo yega na dje. Organisacion Mundial di Salud (OMS) ta defini ‘active ageing’ como un proceso pa optimalisa oportunidad den salud, participacion y siguridad pa mehora calidad di bida den transcurso di un persona su bida. E ta conta pa individual pero tambe pa grupo den poblacion. ‘Active ageing’ ta lag’e persona realisa nan potencial bienestar fisico, social y mental durante bida y pa participa den comunidad, mientras sigura proteccion, siguridad y cuido si mester. Pa siña mas con bo persona por envehece saludabel, ta invita henter e comunidad pa participa den e congreso. Ya caba tin 250 inscripcion cual ta inclui studiantenan di IPA, EPI y clubnan social. Ta cobrando
solamente 50 florin pa adulto y studiantenan cu ta encera participacion den tur dos actividad, esta e workshop y e congreso. Pa profesionalnan lo cobra 90 florin pa ambos actividad. Pa mas informacion por tuma contacto cu Fundacion Movemiento ta Bida pa medio di  594-2546 of bishita nan Facebook Page: Fundacion Movemiento ta Bida.

Comments

Wendys
Banco di Caribe
WEB

comments