24ora.com a presenta pruebanan den Corte contra Ralph Maduro

0
1997

Ta for di aña pasa caba, nos redactor a cuestiona (e tempo ey) Minister Otmar Oduber riba e forma con e tabata duna tur trabou na su amigo/socio Ralph Maduro. Den e famoso conferencia di prensa na Maart 2016, e mandatario a “perde cabes” y bisa cu e lo hiba Nelson Andrade dilanti Corte, loke nunca el a haci comokiera cu e tabata sa cu e pruebanan no ta na su fabor.

Wendys
WEB
Banco di Caribe

Pero asina mes Ralph Maduro, kende desde aña 2009 cu su amigo a bira Minister a habri y cera un cantidad di negoshi, awe a dicidi di pidi rectificacion pasobra Otmar Oduber nunca tabata su socio. E mesun Otmar Oduber cu a bisa bon cla cu e tabata doño di e compania cu awe Maduro ta manehando. E tempo aya tampoco Oduber su nomber no tabata aparece sino di su casa y e pareha di Maduro.

Abogado mr. Rossi Marchena a defende e interes di Alpha Printing, mientras cu abogado mr. Glendeline Croes a representa Headlines Group den Corte.

E caso a cuminsa cu abogado Marchena pidiendo rectificacion pasobra dor di cuestiona e rol di Natasha Roga (pareha di Ralph Maduro) como Presidente di Hunta di Comisario di Arubus, banda di Alpha Printing cu tabata haya tur trabou di imprenta y plakmento di sticker riba busnan di Arubus, cu e noticia a caus’e daño. Tambe e abogado a para riba cu Otmar Oduber nunca tabata ni ta socio di Ralph Maduro den niun negoshi. El a bin cu registro di accionnan di e companianan pa demostra cu Maduro ta e unico doño.

Den defensa di 24ora.com, abogado Croes a mustra cu henter e caso ta basa riba ponencianan eroneo y mal interpretacion di Ralph Maduro. Pasobra den e noticia no a bisa cu Roga a yuda Maduro sino cu e hecho cu bo pareha ta Presidente di Hunta di Supervision y abo ta haci negoshi cu e mesun compania ey POR crea duda y lanta e sospecho di posibel conflicto di interes.

Pa loke ta Ex Minister Otmar Oduber, e mes a declara publicamente cu e tabata doño di Graphics and Beyond. Pa colmo, awo e no ta doño mas, pero un di e tantisimo companianan riba nomber di Ralph Maduro ta inscribi na Drop and Nuts, e mesun edificio di e suegra di Otmar Oduber!

Den e pruebanan presenta, a mustra e vendorslist di Arubus unda ta mustra cu Alpha Printing a ricibi riba 272 mil florin den e ultimo añanan. Abogado Marchena no por a refuta e prueba, aunke el a cuestiona cu e no ta mira firma di e director riba dje. Hues a puntre si e ta kere cu e documento ta falso of cu si e sumanan no ta cuadra, pero e no por a desmenti. Su defensa e ora ey tabata cu el a cuminsa haci negoshi prome cu su pareha a bira Presidente di Board.

E urgencia di e caso ta, segun abogado Marchena, pasobra e compania Fast Delivery a caba di manda un carta pa Ralph Maduro bisando cu tanten e noticia di Maduro ta riba 24ora.com cu e no lo haci negoshi mas cune. E carta a yega diabierna atardi. Abogado Croes a cuestiona seriedad di e carta aki, siendo Gigi Helder mes tin un compania di imprenta, pues su carta na Printshop ta masha cuestionabel. E ta mustra mas bien un carta pa “yuda” e caso.

Hues a haci hopi pregunta riba e rolnan di tur actornan den e caso aki. E lo dicta sentencia diaranson otro siman pa 8:30am.

Comments

comments