Ralph Maduro ta demanda cu e no ta socio di Otmar Oduber

0
2170

Dialuna awo den oranan di atardi ta tuma luga un caso sumario cu Alpha Printing y Ralph Maduro a entama contra Headlines Group, e compania cu ta maneha e portal di noticia mas lesa na Aruba, esta 24ora.com. Abogado Rossi Marchena ta defende Maduro mientras cu abogado Glendeline “Lalo” Croes ta defende Headlines Group.

Banco di Caribe
Wendys
WEB

Den su demanda, Alpha Printing y Maduro ta bisa cu 24ora.com den un articulo dia 16 di augustus ultimo, lo a insinua cu nan a gana mas di un cuart miyon florin entre 2012 y 2016 den negoshi di plak sticker riba busnan di Arubus y cu Ralph Maduro ta socio y amigo di Otmar Oduber. E ta nenga esaki categoricamente. Tambe Ralph Maduro ta demanda cu na ningun momento su pareha, Natasha Roga, como Presidente di Hunta di Supervision di Arubus, ta forma ningun conflicto di interes pa su compania.

Ralph Maduro, maske su nomber a skeiro e ultimo 8 añanan durante tur reunion di Parlamento, na radio, den corant, na television y na mas di un ocasion publicamente a cuestiona su rol hunto cu Otmar Oduber, awor ta pidi Hues pa rectificacion pa e cuida su bon nomber y imagen den comunidad. Ta masha straño tempo cu partido MEP a haci preguntanan na Minister Otmar Oduber precisamente riba e mesun rol cu Otmar Oduber, e nunca a sali desmenti.

Obviamente e pruebanan di con cerca e dosnan aki ta lo wordo presenta dialuna den Corte. Tambe nos lo mira si Hues ta duna nos rason di cuestiona con por ta posibel cu Bo pareha ta Presidente di Arubus y abo ta haci negoshi na balor di riba 270 mil florin y no por papia di conflicto di interes. Den esaki e director, Theo Croes, nombra dor di e mesun ex Minister Otmar Oduber, tambe ta hunga un rol cuestionabel. E como esun responsabel pa e maneho diario mester a para e asunto aki, pero a opta pa no haci esey y riba dje a duna un declaracion den prensa despues, gañando e forma con Arubus ta maneha e asunto aki di promocion riba su busnan.

Entodo caso 24ora.com a opta pa NO rectifica e noticia aki di Arubus pasobra nos pruebanan den e caso aki y DEN OTRO CASONAN TAMBE cu ta na Ministerio Publico caba pa investigacion, ta mustra cu por tin sospecho cu Ralph Maduro y Otmar Oduber ta haci negoshi hunto, precisamente den departamentonan y organisacionnan unda e ex mandatario tabatin hopi di bisa. Lo keda na Ministerio Publico pa mira si e pruebanan riba mes ta suficiente pa cuminsa un caso penal pa corupcion.

 

Comments

comments