“Mi ta hopi contento y orguyoso cu e muchanan tabata emociona cu nan scol nobo”

0
71

Riba e prome dia di aña escolar 2017-2018 Minister di Enseñanza Michelle Hooyboer-Winklaar tabata tin e honor di ta presente y celebra e apertura di Prinses Amalia Basisschool. E dia aki special a conta cu presencia di tur alumno y mayor, invitadonan special manera Minister Michelle Hooyboer-Winklaar y Minister Richard Arends y otro invitadonan, kendenan hunto a celebra e apertura di Prinses Amalia Basisschool.

WEB
Wendys
Banco di Caribe

Pa e ocasion special aki a canta himno di Aruba. Banda di esaki cabesante Roelien Kock-Hofman a gradici Zulaika Geerman y Ivan Quandus pa a composita y aregla e himno di scol. Durante e ceremonia di apertura, un grupo di mucha a canta y baila e himno di scol y despues a baila un di dos cantica. Tabata algo hopi bunita pa mira ora e muchanan a invita e maestronan y cabesante pa baila.

Tambe a probecha e ocasion pa conta algo di e historia di e scol unda cu na 2011 a cuminsa cu e e scol. Tambe cu 2 biaha Prinses Amalia a termina na di 4 luga den competencia di Mente Inteligente y ta e prome scol cu a bira campeon 2 biaha. Cabesante Roelien Kock-Hofman a splica cu na aña 2015 Minister di Enseñansa a informa nan cu nan lo haya nan propio edificio y lo por sali for di unda nan tabata ubica banda di Elmar na playa. Aña pasa a haci e groundbreaking y conform e planning, awe e scol ta cla pa ricibi mas cu 300 studiantenan.

Durante e discurso di Minister di Enseñanza, Michelle Hooyboer-Winklaar y di Minister Richard Arends, kende tambe a hiba palabra, a desea e alumno y maestronan hopi exito pa e aña escolar 2017-2018. Minister Hooyboer-Winklaar a haci entrega di e yabi di scol na cabesante Roelien Kock-Hofman y a haci esaki den compania di Minister Arends. A procede na corta e cinta, unda cu Minister Hooyboer-Winklaar, Minister Arends, cabesante Kock-Hofman y dos alumno di e scol a haya e honor di corta e cinta. Tur hende tabata yena cu emocionnan di alegria y tabata impresiona con bunita e scol a keda, mientras cu e muchanan tabata ansioso pa cuminsa siña den e edificio nobo di nan scol ubica na Seroe Blanco, banda di Colegio EPI.

Roelin Kock-Hofman, cabesante di Princes Amalia Basisschool a expresa cu e tabata hopi emociona y e acto di apertura tabata hopi bunita. A aprecia e presencia di e mandatarionan. E muchanan tabata hopi emociona y entusiasma, a bisa. “Nos ta hopi contento cu awe oficialmente nos por haci uzo di nos scol. Mi ta hopi contento y orguyoso cu e muchanan tabata emociona cu nan scol”, el a duna di conoce. Un par di dia prome cu scol a inicia, tabatin muchanan cu a pasa na e scol pa mira den cua klas nan ta. Tabatin mucha cu no kier a bay cas, el a corda cu un sonrisa. “Juffrouw nos por haya les di biaha”, nan tabata bisa. Na e prome dia di scol tabatin maestro cu mester ta AO, pero asina mes no kier a perde e esaki. El a presenta pa asina ta hunto cu su colega y alumnonan pa inicia e aña escolar den nan bunita edificio. E emocionnan cerca e maestronan tambe ta hopi halto.
Juffrouw Maria Thérèse Croes, a laga sa cu esaki tabata un dia hopi emocional pa un y tur, pasobra un edificio nobo ta trece hopi alegria. “Pa mi esaki ta extra alegria pasobra na e scol bieu mi tabata den un trailer y awo mi tin un klas cu mi mes por drecha y haci e esfera bunita pa e muchanan”, juffrouw Croes a laga sa. Juffrouw Croes a indica cu el a ricibi tambe hopi ayudo di su famia pa por a prepara su klas pe aña escolar nobo. El a agrega cu ta spera e aña aki cuminsa cu hopi energia y siñando y poniendo enfoke riba e lesnan. Banda di esaki no mester lubida e cosnan leuk cu ta haci cu e muchanan pa asina nan keda cu gana pa bin scol, e docente a remarca.

Comments

comments