Fundacion CINEARUBA ta introduci su prome database di pelicula

0
59

Na 2015 fundacion CINEARUBA a expande su metanan y e necesidad pa bin cu un database unda cu por preserva e herencia di cine local pa e futuro generacionnan tabata importante.
E database ta digital y online, e ta consisti di datonan di peliculanan realisa na Aruba. E coordinador di e proyecto señor Juan Francisco Pardo ta e persona cu a colecta e informacion di peliculanan cu a wordo traha na Aruba te cu awor. “Como cineasta ta importante pa sa e historia di cine di bo propio pais. Tempo mi a studia cine na Spaña mi a siña e historia di cine di Spaña, di Europa y esun di America, pero esun di mi propio pais mes mi no tabata sa. Semper mi tabata curioso pa sa di tur e peliculanan cu a wordo traha na Aruba, pero e datonan ey mi no por a haya ningun caminda, pa e motibo ey e database ta hopi importante.”

Banco di Caribe
WEB
Wendys

Ultimo tempo tin hopi pelicula di ficcion ta wordo traha na Aruba y ta importante pa tin tur e datonan di e peliculanan aki registra, paso e tempo ta pasa y e informacion ta bay perdi. Actual e database tin datonan di peliculanan narrativo, pero tin e opcion pa registra documentarionan tambe. Fundacion CINEARUBA kier completa e lista di peliculanan narrativo prome y despues inicia cu un lista di documentario. “Nos ta sigur cu tin algun pelicula di ficcion di antes cu ainda nos no tin e datonan, nos kier haci un yamada na esnan cu tin peliculanan di ficcion pa registra nan peliculanan.”
Ta posibel pa registra unicamente peliculanan realisa na nivel profesional cu a wordo produci y filma na Aruba y tabata tin un presentacion na cinema, film festival of a wordo emiti na television. Pa registra y mira e lista di pelicula por bishita e pagina web www.cinearuba.com/database.

E database di peliculanan realisa na Aruba no ta un canal di video, no ta posibel pa wak e peliculanan riba e website. Den futuro fundacion CINEARUBA kier ‘setup’ un ‘media platform’ unda cu lo por wak e peliculanan registra den e database. Pa esnan cu kier wak peliculanan narrativo, fundacion cinearuba tin su plataforma digital di ‘Cinecortico’ cu ta ‘showcase’ e peliculnan cortico traha na Aruba, door di profesionalnan y talentonan emergente residencia na Aruba y den exterior. Pa por wak e peliculanan y resgistra un pelicula bishita www.cinearuba.com/cinecort

Comments

comments