Gobierno cu subsidio pa cubri gastonan di Boekenfonds Colegio Arubano

0
138

Banda di subsidionan social pa muchanan di famia di menos recurso cuminsa aña escolar nobo debidamente prepara, Gobierno di Aruba tambe a anuncia ayera e implementacion di un ayudo na famianan cu tin un yiu ta atende Colegio Arubano. Manera ta conoci, gastonan di buki na e scol menciona ta core den mas di 1 mil Florin y Gabinete Mike Eman II a tuma nota cu pa un gran cantidad di famia, un ayudo ta hopi util. Famianan cu tin un entrada combina bou di 37 mil Florin pa aña, ta bin na remarke pa haya un subsidio na balor di 550 Florin destina na Boekenfonds di Colegio Arubano na nomber di nan yiu.

WEB
Wendys
Banco di Caribe
wendys banner

“Nos ta creando e programanan aki mas dirigi riba e muchanan. Antes a inicia e parti di mehoracion di entrada pa loke ta Bijstand cerca cabes di famia y extra miembro, mientras cu durante ultimo aña a enfoca tambe riba un yudansa acopla na e mucha cu ta bay scol pa sigura cu e tin suficiente entrada pa drenta scol y cu e paña, alimentacion y tur buki cu tin mester,” asina Prome Minister Mike Eman a declara diabierna atardi durante un anuncio publico. Di e manera aki ta percura pa e partinan mas basico pa e famia tin un solidez, “pero tambe pa duna e sinti cu Gobierno tey pa para hunto cu nan den e tarea di lanta nan yiunan si tin poco recurso,” tabata e palabranan di Premier Eman.

E subsidio aki ta forma parti di e pakete denomina ‘Prosperidad Comparti’, anuncia pa prome biaha na januari ultimo y cu cual Gobierno di Aruba ta brinda tambe aumento di pensioen di biehes, aumento di salario minimo, reduccion di tarifa di coriente residencial y comercial, entre otro iniciativanan. Prome Minister Mike Eman: “Ta un honor di por presenta ‘Prosperidad Comparti’ den contexto di aña escolar nobo. Nos sa cu un ayudo di Gobierno no semper ta cubri tur cos, pero esaki ta mas cu un redoblacion di loke tabata haya na 2009.” Famia cu ta cumpli cu e criteria ta ser pidi pa acudi lo mas lihe posibel na Departamento di Asuntonan Social pa realisa e tramitenan necesario.

Comments

comments