E fin di siman aki lo bay tin e ultimo paradanan di Carnaval. For di cuminsamento caba, tabata tin detencion. Segun Lito Lacle, vocero policial, 10 evento carnavalesco a tuma luga, faltando 3. Fakkel tabata tin en total di 24 detencion. Balonnen optocht tabata tin 3 detencion. Caiso di Mucha tabata tin 1 detencion. Prefinal di Caiso tabata tin 2 detencion. E gran final di calypso tabata tin 2 detencion. Parada di Playa di Mucha tabata tin 16 detencion. Hebbe Hebbe tabata tin 10. Jouvert Morning tabata tin 23, lighting parade tabata tin 17 y por ultimo carnaval di mucha na San Nicolas, tabata tin 20 detencion. E ultimo tresnan, jouvert morning tabata tin 20 aña pasa, Lighting Parade tabata tin 5 aña pasa y carnaval di mucha na San Nicolas tabata tin 8 aña pasa, compara e aña aki cu tabata tin 20.
Edad
Lacle a sigui splica cu motibonan cu ta resalta cu tin posesion di droga y bringamento. Si wak e edad mas hoben durante e 10 eventonan cu a tuma luga, e edad mas hoben ta 13 aña y e edad mas bieu ta 53 aña. Loke ta resalta ta e edadnan di 15, 16 y 17 aña cu ta bin den mayoria di e detencionnan.
Armanan confisca
Hopi di e muchanan aki ta kere cu door di tin un cuchiu so, ta castigabel. Pero ley di arma ta bisa cu bo por tin un artefacto den bo poder di tal manera cu por wordo uza como arma, tambe ta castigabel. Nan lo ta pensa cu uzando un sker, no ta castigabel pa ley. Pero den e caso aki, e articulo di Wapenverordening ta cubri esaki tambe.
Listramento preventivo
Tin diferente articulo pa traha cun’e. Mas of menos 25 articulo cu Ministerio Publico cu ta duna Cuerpo Policial pa traha cun’e, cu ta mara na un boet. E tarea ta pa rista e personanan aki y bay over na detencion, si haya algo cu ta castigabel pa ley. Pero tin cu corda, ora detencion cay, tin cu bay warda, unda cu nan lo wordo presenta dilanti un subfiscal y hopi biaha fiscal ta presente. Ta un control cu nan ta eherce riba cierto detencion tabata legal of no.
Mensahe pa comunidad
Te awor aki, si mira en total 10 evento tabata tin 118 detencion, awor aki loke kier pa e ultimo 3 eventonan aki, bay sikiera rebaha e cantidad di detencion na minimo. Cada un detencion ta dimas. Mirando e comportacion di hubentud, cual ta e problema di mas grandi cu tin awor aki. Si mira bon, den mayoria di e casonan aki, entre otro Jouvert Morning, 11 di nan tabata menor di edad. Tin cu bay traha mas duro riba esaki, no solamente Cuerpo Policial. E cifranan aki ta bon pa presenta na pueblo, pero e diferente instancianan tin cu bay traha hunto, pa asina preveni pa e muchanan bay den mal caminda.
Cooperacion
Mayor, gobierno y pueblo tin un rol den esaki. Instancianan cu mester tene na cuenta cu esaki, cu e cifranan ta hopi importante pa nan, por hay’e na Ministerio Publico cu detayenan completo di tal manera cu por traha cun’e, pa campañanan di prevencion pa loke ta Carnaval 65.
Reaccion riba listramento
Pa loke ta listramento na curpa, ta traha cun’e. E cartera ta na bo curpa. Polis por bay over na rista esaki tambe. Den cartera por sconde droga y hasta bala cayente. Muchanan ta birando creativo. Diferente cos por sconde den e carteranan aki. Por sconde hasta pida blade di stanley mas di manera cu por uz’e mas despues. Si e scherf un hende caba, e por muri di esey, segun Lito Lacle.
